ប្រជាពលរដ្ឋចំនួន ២៨៧៦៣ គ្រួសារ ក្នុងភូមិសង្កែវារ ឃុំនិង ស្រុកបវេល ខេត្តបាត់ដំបង បានទទួលសមិទ្ធផលថ្មី ជាផ្លូវបេតុង ចំនួន ៥ខ្សែ និងអំពូលសូឡា ១០០ ដើម ពីឯកឧត្តម សុខលូ អភិបាលនៃគណៈអភិបាលខេត្ត បាត់ដំបង ដែលប្រារព្ធ ពិធីសម្ពោធ ដាក់ឱ្យប្រើប្រាស់ កាលពីព្រឹកថ្ងៃទី ២៨ ខែកញ្ញា ឆ្នាំ ២០២៤ នៅក្នុងបរិវេណ វត្តសង្កែរវាឃុំបវេល។
ឯកឧត្តម សុខលូ បានផ្ដាំផ្ញើ ដល់ប្រជាពលរដ្ឋ ដែលរស់នៅ រ៉បផ្លូវបេតុង ទាំង ៥ ខ្សែនេះថា ផ្លូវទាំងប្រាំខ្សែ ក្នុងភូមិសង្កែវារនេះ គឺមានដាំដើមឈើ អមសងខាងផ្លូវ ហើយដើមឈើទាំងនេះ ឯកឧត្តម សុំឲ្យប្រជាពលរដ្ឋ ជួយមើលថែរក្សាការពារ ស្រោចទឹក ធ្វើយ៉ាងណាឱ្យបានរស់ ចេញពណ៌ខៀវស្រស់បំព្រង ដែលជាផ្នែកមួយ ជួយលម្អដល់ភូមិដ្ឋានរបស់យើង ក៏ដូចជាចូលរួម ការពារបរិស្ថាន អនាម័យ សម្រាប់សុខភាព ប្រជាពលរដ្ឋក្នុងមូលដ្ឋានយើងនេះទៀតផងដែរ។
ជាមួយគ្នានេះ ឯកឧត្តមសុខលូ និងលោកជំទាវ ក៏បាននាំយកនៅ គ្រឿងបរិភោគ ភេសជ្ជៈ និងបច្ច័យជាង ២ លានរៀល ប្រគេនដល់ព្រះសង្ឃ ក្នុងវត្តសង្កែវានេះផងដែរ។ ហើយឯកឧត្តមក៏បាននាំយក អំណោយមនុស្សធម៌ សាខាកាកបាទក្រហមកម្ពុជា ខេត្តបាត់ដំបង ទៅចែកជូនដល់ប្រជាពលរដ្ឋ ដែលមានការខ្វះខាត ក្នុងជីវភាពរស់នៅ ចំនួន ១០០ គ្រួសារ ក្នុងឃុំ បវេល ដោយក្នុងមួយគ្រួសារៗទទួលបាន អង្ករ ២៥ គីឡូក្រាម មីមួយកេះ ទឹកបរិសុទ្ធមួយកេះ ត្រីខកំប៉ុងមួយយួរ ទឹកស៊ីអ៊ីវមួយយួរ និងទឹកត្រីមួយយួរ៕ អត្ថបទ ម៉ូត វ៉ោយហូរ
