ពលរដ្ឋ​ខ្មែរ​នៅ​បន្ត​ឆ្លង​មកកាន់​ប្រទេស​វិញ​តាម​ច្រករបៀង ខេត្តបាត់ដំបង​និង​ប៉ៃលិន ត្រូវបាន​ឃាត់​ពិនិត្យ​សុខភាព​

​ក្រុមគ្រូពេទ្យ​បាន​នឹង​បន្ត​ពិនិត្យ​សុខភាព​និង​អប់រំ​ពលករ​ខ្មែរ​ដែល​សម្រុក​វិល​ចូល​ស្រុក​វិញ​ជាច្រើន​នាក់​តាម​ច្រករបៀង ក្បែរ​ច្រកព្រំដែន​ខេត្ត​ប៉​លិ​ន​និង​ខេត្តបាត់ដំបង​ដែល​ត្រូវ​ភាគី​ថៃ​បិទ​បណ្តោះអាសន្ន​។​

​អគ្គនាយកដ្ឋាន​អន្តោប្រវេសន៍​កម្ពុជា​ អោយដឹងថា​នា​វេលា​ម៉ោង ០៦​និង​៣០​នាទី ថ្ងៃទី​២៣ ខែមីនា ឆ្នាំ​២០២០ មាន​ប្រជាពលរដ្ឋ​ខ្មែរ ដើរ​ឆ្លងកាត់​ចេញពី​ប្រទេស​ថៃ ចូល​ប្រទេស​កម្ពុជា តាម​អូរ​ក្លឹម​ខាងស្តាំ​ប៉ុស្តិ៍​ត្រួតពិនិត្យ ចម្ងាយ​ប្រហែល ១.៣៥០​ម៉ែត្រ ពី​ប៉ុស្តិ៍នគរបាល​ច្រកទ្វារព្រំដែន​អន្តរជាតិ​ព្រំ ។​

​កម្លាំង​នគរបាល​ប៉ុស្តិ៍ បាន​ឲ្យ​ដឹងថា ពលរដ្ឋ​ខាងលើនេះ ត្រូវបាន​ឃាត់ទុក​ដោយ​អាជ្ញាធរខេត្ត​ប៉ៃលិន ០១​ក្រុម ដឹកនាំ​ដោយ​អភិបាលខេត្ត និង​មានការ​ចូលរួម​ពី រដ្ឋបាលខេត្ត​, កម្លាំង​ស្នងការដ្ឋាន​នគរបាល​ខេត្ត​, កម្លាំង​រាជ​អាវុធហត្ថ​, កម្លាំង​របស់​មន្ទីរពេទ្យ​ខេត្ត និង​ការ​រិ​យា​ល័យ​ទំនាក់ទំនង​ព្រំដែន​ប្រចាំ​ច្រក​ព្រំ​។​

​បន្ទាប់មក​មន្ត្រី​មន្ទីរពេទ្យ​ខេត្ត បាន​អប់រំ​ណែនាំ និង​ពិនិត្យ សុខភាព ជូន​ដល់​ប្រជាពលរដ្ឋ រួច ឯកឧត្តម ផាន់ ចាន់ថុល អភិបាល នៃ​គណៈ​អភិបាលខេត្ត បានធ្វើ​ការអប់រំ​ណែនាំ​ដល់​ពួកគាត់ ដើម្បី​បង្ការ ទប់ស្កាត់ ក្នុងការ​ចម្លង​មេរោគ​កូ​វីដ​១៩ រួច ឲ្យ​ប្រជាពលរដ្ឋ​ទាំងនោះ វិលត្រឡប់​ទៅ​ស្រុកកំណើត​រៀងៗ​ខ្លួន​។​

​អគ្គនាយកដ្ឋាន​អន្តោប្រវេសន៍​កម្ពុជា​ អោយដឹង​បន្តថា ចាប់ពី​វេលា​ម៉ោង ១២​និង​១០​នាទី​យប់ រហូតដល់​ម៉ោង ០៤​និង​០០​នាទី​ទាបភ្លឺ ថ្ងៃទី​២៣​មីនា​នេះដែរ មាន​ពលករ​ប្រជាពលរដ្ឋ​ខ្មែរ បាន​បង្ខំចិត្ត​ឆ្លងកាត់​តាម​អូរ​ច្រករបៀង (​ស្លាប​ឆ្វេង​) របស់​ប៉ុស្តិ៍នគរបាល​ច្រកទ្វារព្រំដែន​អន្តរជាតិ​ភ្នំ​ដី ខេត្តបាត់ដំបង ខណៈពេល​ប្រទេស​ថៃ ធ្វើ​ការបិទ​ច្រកទ្វារព្រំដែន​ជា​បណ្តោះអាសន្ន បាន​រកឃើញ និង​នាំ​ពួកគាត់​មក​ទីតាំង​ប៉ុស្តិ៍ ដើម្បី​សួរនាំ​។​

​បន្ទាប់ពី​សួរនាំ​រួច កម្លាំង​ប៉ុស្តិ៍​សហ​ការណ៍​ជាមួយ មន្ត្រី​ច​ត្តា​ឡី​ស័ក បាន​ពិនិត្យ​សុខភាព របស់​ពួកគាត់ និង​សួរនាំ​ពត៌មាន​របស់​ពួកគាត់ ដើម្បី​បំពេញ​ចូលក្នុង​សេចក្តីប្រកាស​សុខភាព របស់​អ្នកដំណើរ​បាន​គ្រប់ៗ​គ្នា ចប់សព្វគ្រប់​។​

​ដោយឡែក ប៉ុ​ស្ត៍នគរបាល​ច្រកទ្វារព្រំដែន​អន្តរជាតិ​ដូង ខេត្តបាត់ដំបង នា​ព្រឹក​ថ្ងៃទី​២៣ ខែមីនា ឆ្នាំ​២០២០ នេះដែរ បាន​សហការ​ជាមួយ ក្រុម​ច​ត្តា​ឡី​ស័ក ត្រួតពិនិត្យ ឯកសារ និង​វាស់​កម្តៅ គ្រប់​តៃកុង​ឡាន​ដឹកទំនិញ ចេញ​-​ចូល តាម​ច្រកទ្វារព្រំដែន​អន្តរជាតិ​ដូង ខេត្តបាត់ដំបង​។​

​ពលករ​ខ្មែរ​សម្រុក​នាំគ្នា​វិល​មក​ស្រុក​វិញ​ទាំងយប់​ទាំង​ថ្ងៃនេះ បន្ទាប់ពី​ថៃ​បិទ​ច្រកព្រំដែន​រវាង​កម្ពុជា​ថៃ ជា​បន្តបន្ទាប់ ជា​បណ្តោះអាសន្ន ដើម្បី​ទប់ស្កាត់​ការរីក​រា​ដាល​ជំងឺ​ខូ​វីដ​១៩ ខណៈ​ប្រទេស​ថៃ​កំពុង​ផ្ទុះ​ជំងឺ​នេះ​កាន់តែខ្លាំង​។​ចំណែក​កម្ពុជា ករណី​ឆ្លង​កូ​វីដ​ក៏បាន​ហក់​លឿន​ដែរ មកទល់ពេលនេះ​កើនឡើង​៨៦​ករណី​ហើយ​ដែរ​៕

​អត្ថបទ​: ភី សុខ​