បាត់ដំបងៈ ការបាត់បង់ព្រៃឈើ នៅក្នុងខេត្តបាត់ដំបង ដោយសារតម្រូវការប្រើប្រាស់ដីកសិកម្មរបស់ប្រជាពលរដ្ឋពីមួយឆ្នាំទៅមួយឆ្នាំមានការកើនឡើង និងជនខិលខូចមួយចំនួន កាប់យកទៅធ្វើជំនួញផ្សេងៗ។
លោក អ៊ុច ភិរុណ នាយករងខណ្ឌរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និង នេសាទ ខេត្ដបាត់ដំបង បានមានប្រសាសន៍ថានៅក្នុងកម្មវិធីសន្ទាមតិ កាលពីថ្ងៃទី ៤ ខែមិថុនា ថា ខេត្ដបាត់ដំបងកត្តាបាត់បង់ព្រៃឈើ ដោយសារតម្រូវការប្រើប្រាស់ដីកសិកម្មរបស់ប្រជាពលរដ្ឋពីមួយឆ្នាំទៅមួយឆ្នាំមានការកើនឡើងរហូត ហើយកាប់យកទៅទៅប្រើប្រាស់ និងមានជនខិលខូច មួយចំនួន កាប់យកទៅធ្វើជំនួញផ្សេងៗផងដែរ។
លោកបានបន្ថែមទៀតថា ទន្ទឹមនឹងនេះ រដ្ឋបាលព្រៃឈើខេត្ដបាត់ដំបង មានវិធានការទប់ស្កាត់ផងដែរ ដើម្បីស្ដារព្រៃឈើឡើងវិញ ដូចជាក៏ រៀបចំជាសហគមន៍ មានចំនួន ៣៣សហគមន៍។ សម្រាប់រដ្ឋបាលព្រៃឈើខេត្ដបាត់ដំបងក៏មានការបណ្ដុះកូនឈើ ទុកសម្រាប់ដាំលើដីដែលរងការបំផ្លាញ ក្នុងមួយឆ្នាំប្រហែល ចំនួន១១ ម៉ឺនដើម។
លោកបន្ថែមទៀតថា ក្នុងនោះដែរ ការដាំកូនឈើនេះបានដាំនៅតំបន់ដីទំនេរ ដូចជា តាមជើងភ្នំសហគមន៍ ដីតាមអង្គភាពនានាដែលមានបរិវេណធំ សាលារៀន វត្ដអារាម និងតាមភ្លឺស្រែ រឺដីរបស់ប្រជាពលរដ្ឋ ដែលចង់ចូលរួមស្ដារព្រៃឈើឡើងវិញផងដែរ។ប្រភេទកូនឈើដែលបានបណ្ដុះទាំងនោះមានដូចជា បេង ក្រញូង នាងនួន ធ្នង់ គរគី ឈើទាល ហើយក៏មានប្រភេទដើមផ្កាលម្អរ ផងដែរដូចជា ផ្កាត្របែកព្រៃ ប្រាំដំឡឹង លឿងរាជ ។
លោកបន្ថែមថា ជារាងរាល់ឆ្នាំរដ្ឋបាលព្រៃឈើខេត្តបាត់ដំបងបានប្រារពន្ធពិធីរុក្ខទិវាថ្នាក់ខេត្ដផងដែរ ប៉ុន្តែដោយសារឆ្នាំ២០២០នេះមានផលប៉ះពាល់ពីជំងឺដូវីដ-១៩ ទើបរដ្ឋាភិបាលបានផ្អាកការដាំកូនឈើលំដាប់ថ្នាក់ជាតិសិន។ ប៉ុន្តែសម្រាប់រដ្ឋបាលព្រៃឈើខេត្ដបាត់ដំបងក៏ ដូចជាសហគមន៍តាមតំបន់ នៅតែបន្តដាំ នឹងប្រកាសផ្ដល់ព័ត៍មានដល់ពលរដ្ឋ ដើម្បីនាំគ្នាដាំកូនឈើឡើងវិញ ។
លោកបានបន្តថា តាមតំបន់ព្រៃសហគមន៍មួយចំនួន តាមជើងភ្នំអាចនឹងមានដើមឈើដុះមកវិញតាមបែបធម្មជាតិវិញផងដែរ។ជាចុងក្រោយលោកបានសំណូមពរ ដល់ប្រជាពលរដ្ឋ ចូលរួមការពារ ក៏ដូចជាដាំកូនឈើឡើងវិញទាំងអស់គ្នា៕
អត្ថបទ៖ បាន ធារ៉ា សារព័ត៌មានពលរដ្ឋ