បាត់ដំបង ៖ ប្រជាពលរដ្ឋក្រីក្រ ស្ត្រីមេម៉ាយ និងចាស់ជរាគ្មានទីពឹង ដែលជាជនជាតិដើមភាគតិចព័រ រស់នៅភូមិភ្នំរៃ ឃុំតាតោក ស្រុកសំឡូត ខេត្តបាត់ដំបង ប្រមាណ ១០០គ្រួសារ បានទទួលអំណោយ ជាគ្រឿងឧបភោគ បរិភោគ និង ថវិការ មួយចំនួនពីថ្នាក់ដឹកនាំនារីខេត្តបាត់ដំបង កាលពីថ្ងៃទី ០៤ ខែ មីនា ឆ្នាំ ២០២០ ។
លោក ជំទាវ ញឹក សាគុណ សមាជិកក្រុមប្រឹក្សាខេត្តបាត់ដំបង និង ជាប្រធានគណៈកម្មាធិការពិគ្រោះយោបលស្ត្រីនិងកុមារខេត្ត ដែលបានដឹកនាំប្រតិភូជាស្ត្រីក្នុងមន្ទីរស្ថាប័នពាក់ព័ន្ធ ចុះសួរសុខទុក្ខជនជាតិដើមភាគតិច ព័រ ខាងលើនេះបានមានប្រសាសន៍ថា អំណោយនាពេលនេះ ថ្វីត្បិតតែតិចតួច វាអាច រួមចំណែកកាត់បន្ថយការលំបាករបស់បងប្អូនបានមួយរយៈពេល ។
លោកជំទាវបានថ្លែងថាការជួបសំណេះសំណាល និង ផ្តល់អំណោយនាពេលនេះ គឺដើម្បីអបអរសាទរ ទិវានារីអន្តរជាតិ ៨មីនា នៅក្រោមប្រធានបទ មានសន្តិភាព មានសមភាពយេនឌ័រ ដែលទិវានេះ រំលឹកដល់ ការតស៊ូ ពុះពារ របស់ នារី ដើម្បីទទួលបានសិទ្ធសេរីភាព ស្មើគ្នាជាមួយបុរស ។
លោកជំទាវតំណាងនារីខេត្ត បានបន្តថា បើបងប្អូនស្ត្រីនិងកុមារ ជាជនជាតិដើមភាគតិចត្រូវបានរងនៅការរំលោភបំពានផ្សេងៗ អាចរកអន្តរាគមន៍ ជាបន្ទាន់មកកាន់អាជ្ញាធរ មូលដ្ឋាន មន្ទីរកិច្ចការនារីខេត្ត រឺ ទាក់ទងមកកាន់លោកជំទាវផ្ទាល់ក៏បាន ដើម្បីធ្វើការជួយដោះស្រាយបានទាន់ពេលវេលា ។
សូមបញ្ជាក់ថា ជនជាតិដើមភាគតិចព័រភ្នំរៃ មាន ២០០គ្រួសារ ស្មើរនិងមនុស្សរាយ ៥៤៦ នាក់ ដែលកំពុងប្រកបរបរចិញ្ចឹមជីវិត ដោយផ្អែកលើការធ្វើចំការវិលជុំ និង រកអនុផលព្រៃឈើ ដើម្បីចិញ្ចឹមជីវិត។
ការចែកអំណោយនាពេលនេះក៏មានការចូលរួមចំណែកពីអង្គការមេធាវីឥតព្រំដែន និង សប្បុរសជន ផងដែរ ៕
អត្ថបទ ៖ ភី សុខ
