ការយកចំណីផ្លូវធ្វើអាជីវកម្មត្រូវបានប្រជាពលជាច្រើនមានការមិនពេញចិត្ត ហើយចង់ឱ្យមានការរៀបចំឱ្យបានត្រឹមត្រូវពីអាជ្ញាធរ ក្នុងគោលបំណងដើម្បីបាននូវសុវត្ថិភាព និង សោភ័ណភាពសម្រាប់ក្រុងបាត់ដំបងផ្ទាស់តែម្តង ។
លោក សារៈ ជានិស្សិតកំពុងសិក្សាផ្នែកច្បាប់នៅសាកលវិទ្យាល័យមួយក្នុងខេត្តបាត់ដំបង បាននិយាយថា អាជ្ញាធរពុំទាន់បានរៀបចំឱ្យមានរបៀបរៀបរយគ្រប់កន្លែងនៅឡើយទេ ។ ចំណុចដែលលោកបានធ្វើការសង្កត់ធ្ងន់ គឺតាមបណ្តោយផ្លូវជាតិលេខ៥ ជិតផ្សារបឹងឈូក និង តាមបណ្តោយផ្លូវលេខ៣ ដែលមានភាពរញ៉េរញ៉ៃ ។ លោកបានធ្វើការសំណូមពរដល់ អាជ្ញាធរ និង ប្រជាពលរដ្ឋទាំងអស់សូម ធ្វើយ៉ាងណាសហការគ្នាក្នុងការរៀបចំឱ្យមានរបៀបរៀបរយ កុំរងចាំទាល់តែមានប្រតិកម្មទើបមានការកែប្រែ ។
លោក ផេង សិទ្ធី អភិបាលក្រុងបាត់ដំបងបានមានប្រសាសន៍ថា សម្រាប់ការរៀបចំផ្សានៅក្នុងក្រុងបាត់ដំបងគឺតែមានការផ្សព្វផ្សាយដល់ប្រជាពលរដ្ឋជារឿយៗ តែការចូលរួមរបស់ពួកគាត់នៅមានកម្រិតនៅឡើយ។
គួរបញ្ជាក់ផងដែរថាក្នុងពេលឆាប់ៗនេះ ប្រហែលជាសប្តាហ៍ក្រោយនឹងមានក្រុមចល័តចុះត្រួតពិនិត្យ ដូចនេះចំពោះយាន្តយន្តដែលចតគ្មានសណ្តាប់ធ្នាប់ នឹងត្រូវស្ទួចទៅទុកនៅកន្លែងសុវត្ថិភាព ហើយនឹងមានការអប់រំដល់ម្ចាស់យាន្តយន្តផងដែរ។
គួររម្លឹកផងដែរថា ការយកចំណីផ្លូវធ្វើអាជីវកម្មបានធ្វើឱ្យសោភ័ណភាពក្រុងគ្មានសណ្តាប់ធ្នាប់ និង ងាយប្រឈមនឹងគ្រោះថ្នាក់ផ្សេងៗ ។ ការទទូចរបស់ប្រជាពលរដ្ឋ គឺធ្វើយ៉ាងណាចង់ឱ្យអជ្ញាធរជួយរៀបចំឱ្យបានត្រឹមត្រូវ ។ដោយឡែក កិច្ចការនេះ ដើម្បីឱ្យមានភាពប្រសើរឡើងទៅបានលុះត្រាតែ មានការចូលទាំងអស់គ្នា រវាងអាជ្ញាធរ និង ប្រជាពលរដ្ឋ, ហើយត្រូវផ្តោតសំខាន់ពិសេសគឺការអប់រំ ៕
អត្ថបទ៖ ម៉ន ឆវ័ន្ត
