រដ្ឋសភាកម្ពុជា នឹងដាក់ឲ្យមន្ត្រីរបស់ខ្លួន អនុវត្តន៍ការធ្វើការងារតាមអនឡាញ ដើម្បីការពារខ្លួនពីការរាលដាលជំងឺរលាកផ្លូវដង្ហើម ដែលបង្កដោយមេរោគ Covid-19 មានន័យថា មន្ត្រីសភាទាំងអស់ អាចធ្វើការងារពីផ្ទះបាន។
ឯកឧត្តម ឡេង ប៉េងឡុង អគ្គលេខាធិការដ្ឋសភា បានថ្លែងប្រាប់ក្រុមអ្នកព័ត៌មាន នៅព្រឹកថ្ងៃទី១៧ ខែមីនា ឆ្នាំ២០២០នេះ បានឲ្យដឹងបន្ថែមថា ក្នុងពេលដែលមេរោគ Covid-19 កំពុងរាតត្បាតកាន់តែខ្លាំងនោះ សភាចង់កាត់បន្ថយការចរាចរណ៍ឯកសារដោយផ្ទាល់ឲ្យបានតិចបំផុត និងការធ្វើការងារតាមអនឡាញឲ្យបានច្រើនបំផុត។
អគ្គលេខាធិការរដ្ឋសភាខាងលើ បានបញ្ជាក់យ៉ាងដូច្នេះថា ៖ យើងបានរៀបចំឲ្យមានជាអាសយដ្ឋានលើអនឡាញ យើងនឹងដាក់នៅលើ វេប សាយរដ្ឋសភា។ អនឡាញ មានការទាក់ទងមកអគ្គលេខាធិការដ្ឋានរដ្ឋសភាផ្ទាល់ អនឡាញដែលទាក់ទងមកគណៈកម្មការផ្សេងៗ ទាក់ទងនឹង ខុទ្ទកាល័យផ្សេងៗ ។
វិធានការរបស់រដ្ឋសភាជាតិកម្ពុជានេះ ស្របពេលខូវីដ១៩ កំពុងរីករាលដាលជាសកល ហើយកម្ពុជាបានរកឃើញអ្នកឆ្លងជំងឺនេះកើនឡើងដល់ចំនួន២៤នាក់ ៕
ភី សុខ