រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានជូនដំណឹងដល់ សាធារណជន ឲ្យបានជ្រាបថា ក្នុងរដូវនេសាទ ឆ្នាំ ២០២១ ២០២២នេះ បន្ទាប់ពីបានធ្វើការ សង្កេតតាមដាន កំពស់ទឹក ដែលហូរចេញពីបឹង ដែលហូរចេញពីបឹងទន្លេសាប ពិនិត្យឃើញថា គន្លងដាយនៅតាម ដងទន្លេសាប ក្នុងភូមិសាស្ត្រខេត្តកណ្ដាល រាជធានីភ្នំពេញ អាចនេសាទត្រីបានច្រើន នៅក្នុងខែមិគសិរទេ ចាប់ពីថ្ងៃទី ១២ រហូតដល់ថ្ងៃទី ១៦ ខែធ្នូឆ្នាំ ២០២១ ប្រសិនបើមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះ។
យោងលើស្ថានភាព ដូចបានជម្រាបជូនមកនេះ រដ្ឋបាលជលផល សូមអញ្ជើញបងប្អូន ប្រជាពលរដ្ឋដែលមានបំណង ចង់ធ្វើប្រហុក ផ្អក ឬត្រីឆ្អើរជាដើម សម្រាប់ទុកបរិភោគប្រចាំឆ្នាំ សូមអញ្ជើញមកទិញត្រី ឱ្យបានរួសរាន់ តាមពេលវេលា នៅទីកន្លែង ដូចបានជម្រាបជូនខាងលើ។ ជាមួយគ្នានេះ រដ្ឋបាលជលផល សូមសំណូមពរ ដល់អាជ្ញាធរមូលដ្ឋាន ឬសមត្ថកិច្ចពាក់ព័ន្ធ សូមមេត្តាជួយបង្កលក្ខណៈ ភាពងាយស្រួល ជូនដល់បងប្អូនប្រជាពលរដ្ឋ បានធ្វើដំណើរស្នាក់នៅ និងដឹកជញ្ជូន ផលិតផលត្រី បានដោយរលូន តាមការគួរ។ ទន្ទឹមនឹងនេះ រដ្ឋបាលជលផល សូមអំពាវនាវ ដល់បងប្អូនប្រជាពលរដ្ឋ មេត្តាអនុវត្តតាម ការណែនាំ របស់ក្រសួងសុខាភិបាល ស្ដីពីវិធានការ ការពារ ជំងឺកូវិត ១៩ ឲ្យបានជាប្រចាំគ្រប់ៗគ្នា៕ ប្រភពAKP
