ការឧបត្ថម្ភ និង ការផ្តល់សេវាសុខភាពដល់ស្ត្រីមានផ្ទៃពោះ និង កុមារ គឺអនុវត្តចំពោះតែស្ត្រីក្រីក្រមានផ្ទៃពោះ និង កូនរបស់គាត់ដែលមានអាយុក្រោម២ឆ្នាំ។
លោកឱសថបណ្ឌិត វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបងលោកមានប្រសាសន៍ថាៈ តាមសេចក្ដីប្រកាសអន្តរក្រសួងលេខ៖ ៥២៤ សហវ.ប្រក ចុះថ្ងៃអង្គារ ៣រោច ខែពិសាខ ឆ្នាំកុរឯកស័ក ព.ស២៥៦៣ ត្រូវនឹងថ្ងៃទី ២១ ខែឧសភា ឆ្នាំ២០១៩ ស្ដីពីការអនុវត្តកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកូនអាយុក្រោម២ឆ្នាំ នៃគ្រួសារមានប័ណ្ណសមធម៌ ឬប័ណ្ណអាទិភាព៖
•ប្រាក់ឧបត្ថម្ភចំនួន ៧៦០,០០០ រៀល ត្រូវបានផ្ដល់ជូននៅពេលស្ត្រីក្រីក្រមានផ្ទៃពោះ និងកូនមកទទួលសេវានៅមូលដ្ឋានសុខាភិបាលសាធារណៈជា ៣ដំណាក់កាល៖
1. ដំណាក់កាលទាំងប៣
•ដំណាក់កាលទី១ មុនសម្រាល ៤០,០០០រៀល X ៤ដង
•ដំណាក់កាលទី២ សម្រាលកូន ២០០,០០០រៀល តែម្ដងគត់
•ដំណាក់កាលទី៣ ក្រោយសម្រាល ៤០,០០០រៀល X ៣ដង និង យកកូនមក
ចាក់ថ្នាំបង្ការ ៤០,០០០រៀល X ៧ដង
2. ករណីរលូតកូន (តែមិនរលូតទេ)
•អាយុគភ៌ <១២សប្ដាហ៍ ៤០,០០០រៀល តែម្ដងគត់
•អាយុគភ៌១២-២៤សប្ដាហ៍ ៤០,០០០រៀល X ២ដង
3. ករណីកូនស្លាប់
•ពេលសម្រាល ២០០,០០០រៀល
•ក្រោយសម្រាល ៤០,០០០រៀល X ៣ដង
4. ករណីម្ដាយស្លាប់ (ជូនអាណាព្យាបាលស្របច្បាប់ ឬអ្នកនាំកូនមកចាក់ថ្នាំបង្ការ)
•ពេលសម្រាល ២០០,០០០រៀល
•ក្រោយសម្រាល ៤០,០០០រៀល X ១០ដង
លោកឱសថបណ្ឌិត វឿង ប៊ុនរ៉េត បានមានប្រសាសន៍បន្តថា ស្ត្រីក្រីក្រដែលមានផ្ទៃពោះ និង មានកូនអាយុក្រោម២ឆ្នាំនៃគ្រួសារដែលមានប័ណ្ណសមធម៌ ឬប័ណ្ណអាទិភាព នឹងទទួលបានប្រាក់ឧបត្ថម្ភ ចាប់ពីថ្ងៃទី ០១ ខែមិថុនា ឆ្នាំ២០១៩នេះតទៅ។
ជាចុងក្រោយ លោកឱសថបណ្ឌិត វឿង ប៊ុនរ៉េត ក៏បានសំណូមពរអោយស្ត្រីមានផ្ទៃពោះទាំងអស់មកពិនិត្យសុខភាពអោយបានទៀងទាត់ និងជួបប្រឹក្សាយោបល់ជាមួយគ្រូពេទ្យអោយបានត្រឹមត្រូវ ដើម្បីទទួលបាលដំបូន្មានល្អៗក្នុងការថែទាំសុខភាព។
អត្ថបទ៖ កញ្ញា រិន ម៉ារីយ៉ាន
