ពិធីចូលឆ្នាំថ្មីប្រពៃណីជនជាតិចិនជិតចូលមកដល់គេសង្កេតឃើញថា ប្រជាជនខ្មែរភាគច្រើនដែលជាប់ខ្សែចិនបានត្រៀមរៀបចំគ្រឿងរណ្ដាប់មួយចំនួនដូចជា មាន់ ជ្រូក- ផ្លែឈើ ផ្កាភ្ញីនិងគ្រឿងរណ្ដាប់ផ្សេងៗមួយចំនួនទៀតដើម្បីត្រៀមសែនចិននៅថ្ងៃខាងមុខផងដែរ។ ជំនឿក្នុងការសែនចិន ត្រូវបានប្រជាពលរដ្ឋមួយចំនួនលើកឡើងថា សែនចិនដើម្បីជួយអោយរកស៊ីមានបានជាដើម។
យុវតីមួយរូបបានលើកឡើងថា ប្រជាជនខ្មែរភាគច្រើនកាត់ចិន ការសែនចិនក៏មានច្រើន តែក៏មានប្រជាជនខ្មែរមួយចំនួនទៀតដែលមិនកាត់ចិនផងនោះ ក៏មានរៀបចំសែនចិនតាមគ្នាដែរ ប្អូនបានលើកឡើងការធ្វើបែបនេះគឺធ្វើឱ្យវប្បធម៌ខ្មែរធ្លាក់ចុះ ហើយវប្បធម៌ចិនកើនឡើង ពេលចូលឆ្នាំចិនម្ដងៗពួកគាត់យកថ្ងៃហ្នឹងដើម្បីឈប់សម្រាកជួបជុំ មិត្តភក្ក ឬក្រុមគ្រួសារជាដើម។
ប្អូនបានលើកឡើងបន្ថែមថា នៅថ្ងៃសែនចិនគឺសង្កេតឃើញថា ការធ្វើចរាចរណ៍តាមដងផ្លូវហាក់មានការមមាញឹកជាងថ្ងៃធម្មតា ហើយប្អូនក៍មានការព្រួយបារម្ភចំពោះសុវត្ថិភាពពេលធ្វើដំណើរ ក្រែងមានករណីគ្រោះថ្នាក់ចរាចរណ៍កើតឡើងព្រោះសែនចិនស្រវឹងខ្មែរ។ ប្អូនក៏បានសំណូមពរឱ្យ ប្រជាពលរដ្ឋដែលសែនចិនទាំងអស់ សូមពិនិត្យមើលភ្លើងទៀនភ្លើងធូប មុនធ្វើដំណើរចេញពីផ្ទះ ដើម្បីកុំអោយមានគ្រោះអគ្គីភ័យកើតមានឡើងផងដែរ។
ទោះជាយ៉ាងណាក៏ដោយ ក៏សមត្ថកិច្ច និងកងរាជអាវុធហត្ថខេត្ត មានការរៀបចំសណ្ដាប់ធ្នាប់បន្ថែមយ៉ាងតឹងរ៉ឹង ដើម្បីអោយប្រជាពលរដ្ឋទាំងអស់គ្នាទទួលបាននូវភាពសប្បាយរីករាយនៅក្នុងពេលឱកាសចូលឆ្នាំចិននេះផងដែរ។
អត្ថបទ៖ កញ្ញា រិន ម៉ារីយ៉ាន
