សម្ត​ច​ក្រឡាហោម សង្ឃឹម​ថា​រដ្ឋមន្ត្រី​ក្រសួង​យុត្តិធម៌​ថ្មី​នឹង​បន្ត​ដោះស្រាយ​បញ្ហា​កកស្ទះ​សំណុំរឿង​នៅ​តុលាការ​និង​បញ្ហា​ខ្វះខាត​មួយចំនួន​ទៀត​

សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង​មហាផ្ទៃ​បាន​មានប្រសាសន៍ថា​ការកកស្ទះ​សំណុំរឿង កាន់តែ​មាន​ភាពស្មុគស្មាញ បន្ទាប់​ពី​ការដាក់​ឱ្យ​ដំណើរការ​យុទ្ធនាការ​
​ប្រយុទ្ធប្រឆាំង​គ្រឿងញៀន គិត​មកដល់​ពេល​នេះ​ចំនួន​អ្នក​ជាប់​ឃុំ​ក្នុង​សំណុំរឿង​គ្រឿងញៀន​មាន​ជាង​២​ម៉ឺន​២​ពាន់​នាក់ ។ ដោយឡែក​បញ្ហា​ខ្វះ​ទីតាំង​សម្រាប់​បំពេញ​ការងារ​ក៏​ជា​បញ្ហា​ប្រឈម​ដែរ ។ សម្ដេច​សង្ឃឹម​ជឿជាក់ថា​ឯកឧត្តម​រដ្ឋមន្ត្រី​ថ្មី​នឹង​ដោះស្រាយ​បញ្ហា​នេះ​នាពេលខាងមុខ ពិសេស​បន្ទាប់​ពី​បញ្ហា​កូវី​ដ​១៩​មាន​ភាព​ធូរស្រាល ។​

​សម្តេច​មានប្រសាសន៍​នេះ​ខណៈ​អញ្ជើញ​ជា​អធិបតី​ក្នុង​ពិធី​ប្រកាស​ផ្ទេរ និង​ចូល​កាន់​មុខ​តំណែង​រដ្ឋមន្ត្រី​ក្រសួង​យុត្តិធម៌ ប្រារព្ធ​ធ្វើ​នៅ​ទីស្តីការ​ក្រសួង​យុត្តិធម៌ នា​ថ្ងៃ​ទី​១​ខែ​មេសា ត្រូវ​បាន​សរសេរ​លើ​ផេក​ហ្វេស​ប៊ុក​របស់​សម្តេច​ផ្ទាល់​។​

​សម្ដេច​ក្រឡាហោម បាន​មានប្រសាសន៍​អំពី​ការពង្រឹង​ប្រព័ន្ធយុត្តិធម៌ ដោយ​បាន​ស្នើ​ឱ្យ​ក្រសួង​យុត្តិធម៌​ត្រូវ​បង្កើន​ការលើកកម្ពស់​សេវា​យុត្តិធម៌ ការពង្រឹង​ជំនឿ​ទុកចិត្ត និង​ការទប់ស្កាត់​ការបំពាន​ដោយ​អយុត្តិធម៌​ក្នុង​សង្គម តាមរយៈ​ការពង្រឹង​ការអនុវត្ត​ច្បាប់ ការពង្រឹង​ភាព​ស្អាតស្អំ និង​ក្រមសីលធម៌​មន្ត្រី ការពង្រឹង​យន្តការ​វិន័យ និង​ការធ្វើ​ទំនើបកម្ម​រដ្ឋបាល​យុត្តិធម៌ ។​

​សម្ដេច​ក៏​បាន​ណែនាំ​ឱ្យ​ក្រសួង​យុត្តិធម៌ បន្ត​ពង្រឹង​ការលើកកម្ពស់​ការផ្ដល់​សេវា​យុត្តិធម៌​នៅ​មូលដ្ឋាន ការកែលម្អរ​យន្តការ​ដោះស្រាយ​វិវាទ​ដើម្បី​ឆ្លើយតប​នឹង​ស្ថានភាព​ជាក់ស្ដែង​របស់​សង្គម​ប្រកបដោយ​ប្រសិទ្ធភាព ហើយ​ដើម្បី​សម្រេច​បាន​គោលបំណង​ខាងលើ សម្ដេច​បាន​បន្តថា​ក្រសួង​យុត្តិធម៌ ត្រូវ​ពង្រឹង​ការអនុវត្ត​យុទ្ធសាស្ត្រ​កំណែទម្រង់​ច្បាប់ និង​វិស័យ​យុត្តិធម៌ និង​កំណែ​ទ្រង់​ប្រព័ន្ធយុត្តិធម៌​ឱ្យបាន​ត្រឹមត្រូវ ។​

​ជាមួយគ្នានេះដែរ សម្ដេច​ក៏​បាន​មានប្រសាសន៍​អំពី​តុលាការ​ជំនាញ​នៅ​ថ្នាក់​សាលាដំបូង ដែល​ច្បាប់​បាន​ចែង​ឱ្យមាន​តុលាការ​រដ្ឋប្បវេណី តុលាការ​ព្រហ្មទណ្ឌ តុលាការ​ពាណិជ្ជកម្ម និង​តុលាការ​ការងារ ។ ប៉ុន្តែ​ពេល​នេះ​នៅ​សាលាដំបូង​រាជធានី​ខេត្ត​មិនទាន់​ដំណើរការ​នៅឡើយ​ទេ ។ សម្ដេច​បាន​ណែនាំ​ឱ្យ​ក្រសួង​ខិតខំ​ឱ្យ​អស់​លទ្ធភាព​ដើម្បី​ឱ្យ​តុលាការ​ជំនាញ​នេះ​អាច​ដំណើរការ​ទៅបាន ដើម្បី​ឆ្លើយតប​នឹង​ការកកស្ទះ​សំណុំរឿង ។​

​ពាក់ព័ន្ធ​នឹង​បញ្ហា​កកស្ទះ​សំណុំរឿង សម្ដេច​ក្រឡាហោម ស ខេង ក៏​បាន​សម្ដែង​ការគាំទ្រ​ចំពោះ​គម្រោង​របស់​ក្រសួង​យត្តិ​ធម៌ ដែល​នឹង​បើក​យុទ្ធនាការ​ដោះស្រាយ​ការកកស្ទះ​សំណុំរឿង​តាម​សាលា​ជំនុំជម្រះ​ក្ដី​នាពេល​ឆាប់ៗ​ខាងមុខ ដោយ​សម្ដេច​បាន​ប្រកាស​ផ្ដល់​កិច្ចការ​គាំទ្រ​នូវ​រាល់​បញ្ហា​ណា​ដែល​ទាក់ទង​នឹង​សមត្ថកិច្ច​របស់​ក្រសួងមហាផ្ទៃ ។​

​នៅក្នុង​ឱកាស​នោះ ឯកឧត្តម​កើត រិទ្ធ រដ្ឋមន្ត្រីក្រសួង​យុត្តិធម៌​ថ្មី​បាន​ប្ដេជ្ញាចិត្ត​ស្មោះត្រង់​ជានិច្ច​ចំពោះ​ជាតិ សាសនា ព្រះមហាក្សត្រ បន្ត​អនុវត្ត​គោលនយោបាយ យុទ្ធសាស្ត្រ​រាជរដ្ឋាភិបាល ពិសេស​កម្មវិធី​កំណែទម្រង់​ច្បាប់ និង​យុត្តិធម៌​ដើម្បី​លើកកម្ពស់​ទំនុកចិត្ត​ពី​ប្រជាជន ពង្រឹង​ប្រព័ន្ធ​អភិបាលកិច្ច​ល្អ សុច្ចរិត​ភាព និង​ភាពត្រឹមត្រូវ​នៃ​មន្ត្រី​តុលាការ ដើម្បី​ពង្រឹង​ជំនឿ​ទុកចិត្ត ហើយ​ឯកឧត្តម​សង្ឃឹម​ថា​ថ្នាក់ដឹកនាំ និង​មន្ត្រី​ពាក់ព័ន្ធ​ទាំងអស់​នឹង​ចូលរួម​យ៉ាង​សកម្ម​ដើម្បី​បុព្វហេតុ​ពង្រឹង​នីតិរដ្ឋ​នៅ​កម្ពុជា ។​

​ក្នុងផេក​ផ្លូវការ​សម្ដេច​ក្រឡាហោ​ម ស ខេង បាន​មានប្រសាសន៍​បន្ត​ថា​ឯកឧត្តម កើត រិទ្ធ បាន​ឆ្លងកាត់​ការងារ​ជាច្រើន​នៅ​ក្រសួង​យុត្តិធម៌ ចាប់ពី​ឆ្នាំ​២០០៧​មក ពោល​គឺ​ចាប់ពី​អនុរដ្ឋលេខាធិការ រដ្ឋលេខាធិការ រដ្ឋលេខាធិការ​ប្រចាំការ រហូត​ក្លាយជា​រដ្ឋមន្ត្រី ។ សម្ដេច​ក៏​បាន​សម្ដែង​ការកោតសរសើរ​ឯកឧត្តម​ទេសរដ្ឋមន្ត្រី អង្គ វង្ស​វឌ្ឍនា ដែល​បាន​ចូល​បំរើ​ជាតិ​មាតុភូមិ​ក្នុងនាម​ជា​ថ្នាក់ដឹកនាំ​ក្រសួង​យុត្តិធម៌​ជា​បន្តបន្ទាប់​នា​រយៈពេល​១៩​ឆ្នាំ​មកហើយ​។​

​សម្ដេច​បាន​បន្ថែមថា​នៅក្នុង​ការដ្ឋាន​កំណែទម្រង់​ទាំង​៤​របស់​រាជរដ្ឋាភិបាល គឺ​មាន​កំណែទម្រង់​វិមជ្ឈការ វិសហមជ្ឈការ កំណែទម្រង់​ហិរញ្ញវត្ថុ​សាធារណៈ និង​កំណែទម្រង់​រដ្ឋបាល​សាធារណៈ ដែល​បាន​បង្កើត​លេខាធិការដ្ឋាន​សម្របសម្រួល​មួយ​។ ដូច្នេះ​សម្ដេច​សូម​ឯកភាព និង​គាំទ្រ​ការបញ្ចូល​កំណែទម្រង់​ប្រព័ន្ធ​យុត្តិធម៌​ទៅ​ក្នុង​លេខាធិការដ្ឋាន​នោះ ។​

​មុន​នឹង​បញ្ចប់​សម្ដេច​ក្រឡាហោម ស ខេង ឧបនាយករដ្ឋមន្ត្រី តំណាង​ដ៏​ខ្ពង់ខ្ពស់​សម្ដេច​តេជោ​នាយករដ្ឋមន្ត្រី បាន​សម្ដែង​សេចក្ដីសង្ឃឹម​ជឿជាក់​ថា​ថ្នាក់ដឹកនាំ និង​មន្ត្រីរាជការ​ទាំងអស់​នៃ​ក្រសួង​យុត្តិធម៌ នឹង​ខិតខំ​រួមគ្នា​បំពេញ​បេសកកម្ម​បំរើ​ប្រទេសជាតិ​ឱ្យ​ទទួលបាន​ជោគជ័យ និង​ជូនពរ​ឱ្យ​ជួប​ប្រទះ​តែ​នឹង​សេចក្ដីសុខ​គ្រប់ប្រការ ពិសេស​ចៀសផុត​ពី​ការឆ្លង​ជំងឺ​កូវី​ដ​១៩ ៕
@phy sok​