តាមព័ត៌មានចុងក្រោយអ្នកស្លាប់ដោយគ្រោះថ្នាក់ចរាចរណ៍ នៅលើកំណាត់ផ្លូវជាតិលេខ៥ កំពុងស្ថាបនា ត្រង់ចំណុចក្រុមទី០១ភូមិពពាលខែ ឃុំអូរតាគី ស្រុកថ្មគោល ខេត្តបាត់ដំបង នៅម៉ោង៩និង២០នាទីយប់ថ្ងៃទី២៤ ខែធ្នូឆ្នាំ២០២០ មានអ្នកស្លាប់ចំនួន៨នាក់ របួសធ្ងន់ស្រាល២នាក់។
សមត្ថកិច្ចចរាចរណ៍អោយដឹងថា បើយោងលើគំនូសកង់កូដផ្លូវ និងសាក្សី បំភ្លឺ រថយន្តទាំងពីរបើកបរក្នុងល្បឿនលឿនដូចគ្នា ។សមត្ថកិច្ចសង្ស័យរថយន្តតាស៊ីបែកកង់ រេទៅបុកគ្នាតែម្តង។ (បញ្ជាក់ចំណុចនេះជាផ្លូវកំពុងស្ថាបនាថ្មី គឺពុះចែកជាពីរ ម្ខាងជួសជុលមិនអាចធ្វើដំណើរបាន និងម្ខាងបើកបរទៅមកបាន)
បើតាម លោកវរសេនីយទោ អ៉ឹង សុវណ្ណអធិការរងនគបាលស្រុកថ្មគោលខេត្តបាត់ដំបងអោយដឹងថាករណីគ្រោះថ្នាក់ចរាចរណ៍កើតឡើង រវាងរថយន្តដឹកទឹកកធុនធំ និងរថយន្ត ធុនស្រាល កាម៉ារីហើម ទិសផ្ទុយគ្នា ។
រថយន្តដឹកទំនិញធុនធំ ម៉ាកហ៊ីយ៉ាន់ដាយ(HYUNDAI) ពណ៍ស ពាក់ផ្លាកលេខភ្នំពេញ(3F-0169) បើកពីទិសខាងត្បូងទៅជើងក្នុងល្បឿនលឿន ដល់ចំណុចកើតហេតុ បានបុកជាមួយរថយន្តកាមរី(Camry) ពណ៍ ស ពាក់ផ្លាកលេខកំពង់ស្ពឺ(2A-0377) បើកទិសផ្ទុយគ្នា បណ្តាលឱ្យអ្នកបើកបរ និងអ្នករួមដំណើររថយន្តទាំងសងខាងស្លាប់នៅកន្លែងកើតហេតុចំនួន០៨នាក់ ប្រុស ០៣នាក់ និងរបួសធ្ងន់ស្រាលចំនួន០២ នាក់ ប្រុស ។
១-អ្នកបើកបររថយន្តហ៊ីយ៉ាន់ដាយ(ដឹកទឹកកក)ឈ្មោះ ឡេង សុភ័ក្រ ភេទប្រុស អាយុ២៨ឆ្នាំ រស់នៅភូមិអូរពងមាន់ ឃុំតាគ្រាម ស្រុកបាណន់ ខេត្តបាត់ដំបង (ស្លាប់ )
២.អ្នកបើកបររថយន្តតាស៊ីកាមរីហើម ឈ្មោះ ឆន អុល ភេទប្រុស អាយុ៥៤ឆ្នាំ រស់នៅភូមិថ្មី ឃុំត្រពាំងជង ស្រុកបាកាន ខេត្តពោធិ៍សាត់ របួសធ្ងន់ ។
និង.អ្នករួមដំណើរចំនួន០៨នាក់ ស្លាប់ចំនួន០៧នាក់ក្នុងនោះ ប្រុស០២នាក់ និង របួសស្រាលចំនួន០១នាក់ ប្រុស មិនស្គាល់ឈ្មោះ រស់នៅខេត្តពោធិ៍សាត់។
ករណីនេះ ជំនាញស្រុកបានយករថយន្តសង្គ្រោះដឹកជនរងគ្រោះទាំង០២នាក់ បញ្ជូនទៅមន្ទីរពេទ្យបង្អែកស្រុកថ្មគោល និងប្រគល់ឱ្យការិយាល័យចរាចរណ៍ផ្លូវគោកខេត្តបាត់ដំបង ធ្វើការវាស់វែង ដើម្បីចាត់ការតាមនីតិវិធី ។
សាកសពជនរងគ្រោះទាំង៨នាក់ត្រូវបានតម្កល់ទុកនៅវត្តអូរតាគី រង់ចាំគ្រួសារយកទៅធ្វើបុណ្យតាមប្រពៃណី។
មកទល់ពេលនេះខាងគ្រួសារជនរងគ្រោះបានមកទាក់ទងយកសាកសពទៅធ្វើបុណ្យខ្លះៗហើយ។ភីសុខ
