នាពេលបច្ចុប្បន្ននេះ ហិង្សាក្នុងគ្រួសារនៅតែកើតមានឡើង ដោយសារកត្ដាជាច្រើន ក្នុងនោះ បញ្ហា សេដ្ឋកិច្ចជាបញ្ហាមួយផងដែរ។ ដោយស្ដ្រីមួយចំនួនគ្មានការងារធ្វើពឹងផ្អែកលើ ប្ដីទាំងស្រុង ជាហេតុបង្កជាលេសឲ្យប្ដីប្រើហិង្សា ហើយស្ដ្រីមិនហ៊ានរាយការណ៏ពីបញ្ហានោះដើម្បីទទួលបានយុត្តិធម៏ជាដើម។
លោក វុធ មកពី បវេល បានលើកឡើងថា បញ្ហាហិង្សានេះជាកំហុសរបស់បុរសច្រើនជាងស្ត្រី ស្ត្រីដែលគ្មានការងារនោះ បុរសក៏បានស្វែងរក និង បង្កើតការងារអោយគាត់ដែរ។ លោកក៏បានសំណូមពរសូមអោយអាជ្ញាធរជួយបង្កើនការងារអោយស្ត្រីមានការងារគ្រប់គ្នា ។
លោកស្រី ទេស សុមាលី ប្រធានគណៈកម្មាធិការពិគ្រោះយោបល់ស្ត្រី និង កុមារមានប្រសាសន៍ថា ចំពោះការជួយផ្តល់ការងារជូនស្ត្រីគឺមានសហការណ៍ជាមួយអង្គការផ្សេងៗទៀតដែលពាក់ព័ន្ធ។ ក្នុងនោះមានការផ្តល់ជំនាញនៅមជ្ឈមណ្ឌលព្រៃកូនខ្លា ការផ្តល់ជំនាញដាំដុះបន្លែជាដើម ដើម្បីផ្តល់ចំណូលបន្ថែមក្នុងគ្រួសារ និង អោយស្ត្រីមានការងារ ជំនាញផ្ទាល់ខ្លួនផងដែរ។
ដើម្បីលុបបំបាត់ហិង្សាក្នុងគ្រួសារ វិស័យសេដ្ឋកិច្ចជាកត្តាមួយដែលអាចឲ្យជៀសផុតពីហិង្សាផងដែរ ដូច្នេះហើយ ទាមទារឲ្យអាជ្ងាធរមូលដ្ឋាន ផ្ដល់នៅចំនាញណាមួយសមរម្យ ដល់ស្ដ្រីរងគ្រោះ ដោយមិនពឹងផ្នែកតែលើស្វាមី និង ធ្វើឲ្យស្ដ្រីហ៊ានរាយការណ៍ហិង្សានោះ ដោយមិនលាក់លៀម។
អត្ថបទ៖ ម៉ន ឆវ័ន្ត