អង្កវេទិកា បានឆ្លុះបញ្ចាំងឲ្យឃើញ ពីការគិតគូរខិតខំ ប្រឹងប្រែងរបស់ រដ្ឋបាលក្រុង ការិយាល័យជំនាញវិស័យ ថ្នាក់សង្កាត់ ក្នុងក្រុងបាត់ដំបង ក្នុងការអនុវត្តយ៉ាងខ្ជាប់ខ្ជួន តាមគោលការណ៍ណែនាំ របស់រាជរដ្ឋាភិបាលកម្ពុជា តាមរយៈគណៈកម្មាធិការ ជាតិសម្រាប់ការអភិវឌ្ឍ តាមបែបប្រជាធិបតេយ្យ នៅថ្នាក់ក្រោមជាតិ ហៅថា គជ អប ក្នុងការធ្វើកំណែទម្រង់ ស៊ីជម្រៅ និងយូរអង្វែង ផ្នែករដ្ឋបាល ការអនុវត្តគោលនយោបាយ របស់ថ្នាក់ជាតិ ដោយប្រើប្រាស់នូវយន្តការ ក្រុមប្រឹក្សាខេត្តក្រុងសង្កាត់ ដែលកើតឡើងពីការបោះឆ្នោត ដោយក្រុមប្រឹក្សាឃុំសង្កាត់ ដែលជាតំណាងផ្ទាល់ របស់ប្រជាពលរដ្ឋ។ នេះជាប្រសាសន៍លោកឌឿនហឿន អភិបាលរងក្រុងបាត់ដំបង ថ្លែងក្នុងវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាក្រុងបាត់ដំបង ជាមួយប្រជាពលរដ្ឋ ស្ដីពីកម្មវិធី អភិវឌ្ឍន៍មូលដ្ឋាន និងការផ្ដល់សេវារដ្ឋបាល កាលពីថ្ងៃទី 8 ខែកញ្ញា នៅសាលាក្រុងបាត់ដំបង។ លោកបានបន្តទៀតថា ជាគោលបំណង គឺធានា រាល់បញ្ហាអាទិភាព របស់ប្រជាពលរដ្ឋ ក្នុងដែនសមត្ថកិច្ច ត្រូវបានដោះស្រាយ នឹងឆ្លើយតប បង្កលក្ខណៈ ដល់គ្រប់បណ្ដាផ្នែក ដែលពាក់ព័ន្ធក្នុង មូលដ្ឋាន ត្រូវបានរាប់បញ្ចូល ក្នុងដំណើរការ អភិវឌ្ឍតាមបែប ប្រជាធិបតេយ្យ នៅថ្នាក់ក្រោមជាតិ។
អង្កវេទីការ ផ្សព្វផ្សាយ និងពិគ្រោះយោបល់ របស់ក្រុមប្រឹក្សាក្រុងបាត់ដំបង បានប្រព្រឹត្តទៅដោយភាពរលូន និងបានផ្ដល់ឱកាស ដល់បងប្អូនប្រជាពលរដ្ឋ បានបញ្ចេញមតិ ដោយលើកឡើងជាសំណួរ សេចក្តីត្រូវការ អ្វីជាកង្វល់ បានបញ្ចេញមតិ ដើម្បីស្ថាបនា ថ្នាក់មូលដ្ឋានក្រុង សង្កាត់ប្រកបដោយ ខ្លឹមសារល្អប្រសើរ ។ ជាលទ្ធផល ទទួលបានមាន សំណួរដោយផ្ទាល់មាត់មានចំនួន 7 សំណួរ តាមរយៈក្រដាសសំនួរ មាន 9 សំណួរ និងសំណូមពរផ្សេងៗ មានចំនួន 16 សំណួរ សំណួរទាំងអស់នោះរួមមាន ដូចជាបញ្ហា ផ្លូវប្រឡាយទឹក បង្គោលភ្លើង និងបញ្ហាប្រជាពលរដ្ឋ ចាក់ដីលុបប្រឡាយជាដើម។
ក្នុងនាមក្រុមប្រឹក្សា រដ្ឋបាលក្រុង ក៏ដូចជាវាគ្មិន បានឆ្លើយបំភ្លឺ និងបានធ្វើការបកស្រាយ ជូនម្ចាស់សំណួរបានមួយចំនួន។ ដោយឡែកសំណួរដែលនៅសេសសល់ មួយចំនួនទៀត ដែលជាតម្រូវការ ឲ្យក្រុមការងារ ធ្វើការពិនិត្យ ស្វែងយល់រកដំណោះស្រាយ សមស្របទៅតាមគោលការណ៍ ដឹកនាំរបស់ រដ្ឋបាលក្រុងបាត់ដំបង បំភ្លឺឆ្លើយ តបតាមរយៈ ក្រុមប្រឹក្សាក្រុង ឬតាមយន្តការ នៃក្រុមការងារ ជំនាញវិស័យ ផ្ដល់ព័ត៌មាន តាមដំណាក់កាល ពេលវេលាសមស្រប៕
អត្ថបទ ម៉ុតវ៉ោយហូរ។