ភ្នំពេញ៖ ក្រសួងព័ត៌មានបានពង្រឹងសមត្ថភាពមន្ត្រីរាជការលើការផលិតព័ត៌មានឱ្យមានភាពទាក់ទាញ និងចាប់អារម្មណ៍ពីមហាជនលើព័ត៌មានប្រកបដោយវិជ្ជាជីវៈដែលផ្សាយចេញពីបណ្តាញព័ត៌មានរដ្ឋ។
ឯកឧត្តម ពេជ្រ ប៊ុនរ៉ាទីប្រឹក្សាក្រសួងព័ត៌មាន និងជាគ្រូបង្គោលនៃវគ្គនេះមានប្រសាសន៍ថា កម្មវិធី បណ្តុះបណ្តាល ស្តីពី“ការដាក់ចំណងជើង អត្ថបទ ដំណឹងដ៏ទាក់ទាញ និងការចាប់មុំសរសេរ នៃរឿង”នេះ ដើម្បីបំពេញបន្ថែមជំនាញដល់មន្ត្រីរាជការនៃ ក្រសួងព័ត៌មាន តបតាមការផ្តួចផ្តើមរបស់ឯកឧត្តម ខៀវ កាញារីទ្ធរដ្ឋមន្ត្រីក្រសួងព័ត៌មាន។
ថ្លែងក្នុងវគ្គបណ្តុះបណ្តាល នាព្រឹកថ្ងៃទី២៦ ខែកញ្ញា ឆ្នាំ ២០២០ នៅទីស្តីការក្រសួងព័ត៌មាននោះ
ឯកឧត្តមបញ្ជាក់ថា ការសរសេរចំណងជើង អត្ថបទ ដំណឹងដ៏ទាក់ទាញ គឺជាការសរសេរ ខ្លី ខ្លឹម មានន័យគ្រប់គ្រាន់ បង្ហាញភាពចម្លែក ភាពអស្ចារ្យ អាចបង្កប់ចំងល់ អាចលើកជាសំណូរ អាចលេងពាក្យពេចន៏ដើម្បីឱ្យមហាជន ចង់អាន ចង់ស្តាប់ ចង់ដឹង ចង់តាមដាន ។ ក្រៅពីនេះ ការដាក់ចំណងជើង អត្ថបទ ដំណឹ ដ៏ទាក់ទាញខ្លះ ធ្វើទៅបានទាល់តែរកទម្ងន់បន្ថែមឱ្យសាច់រឿង។
ចំណែកឯការចាប់មុំសរសេរអត្ថបទដំណឹងវិញ គឺធ្វើឡើងតាមរយៈការសរសេររំលេចនូវ ខ្លឹមនៃរឿង ឬបង្ហាញ ជ្រុងមួយនៃបញ្ហា ដែលមានប្រយោជន៍ដល់មនុស្សជាទីចាប់អារម្មណ៍ក្នុងសង្គម ។ អ្នកសរសេរ ត្រូវមានភាពវៃឆ្លាតនិងភ្នែកមុត នៅក្នុងការជ្រើសរើសមុំ ដើម្បីសរសេរ ដោយយកចេញពីហេតុការណ៍ដែលកើតឡើង ឬព្រឹត្តិការណ៍ដែលគេរៀបចំឡើង។ អត្ថបទដែលសរសេរមិនចាប់មុំ គឺជា អត្ថបទ ពិធីការ។ ប៉ុន្តែ អត្ថបទ ពិធីការខ្លះ មានទម្ងន់របស់វាស្រាប់ហើយ។
លោកភី សុខ សិក្ខាកាមចូលរួមក្នុងវគ្គបណ្តុះបណ្តាលនេះ បានគាំទ្រ និងចាត់ទុកថា នេះជាការយកចិត្តទុកដាក់ពីថ្នាក់ដឹកនាំ ក្រសួងព័ត៌មាន ដើម្បីធ្វើយ៉ាងណាជំរុញឱ្យបណ្តាញព័ត៌មានរបស់រដ្ឋទទួលបានការគាំទ្រ និងទុកចិត្តពីសំណាក់ប្រជាពលរដ្ឋ។ លោកសន្យាយកចំណេះដឹងនេះ ទៅអនុវត្តឱ្យមានប្រសិទ្ធភាព។
សូមបញ្ជាក់ថា មន្ត្រីដែលចូលរួមវគ្គបណ្តុះបណ្តាលនេះ មានចំនួន២០នាក់ មកពីគ្រប់អគ្គនាយកដ្ឋានទាំង៥របស់ក្រសួងព័ត៌មាន ហើយក្នុងនោះក៏មានមកពីមន្ទីរព័ត៌មានខេត្តបាត់ដំបង១រូបផងដែរ៕
វិទ្យុជាតិកម្ពុជា៖ លោកចេម ហួត និង លោក ចន ណារិទ្ធ 26 09 2020