មន្ត្រីជំនាញខេត្តបាត់ដំបង បើកកិច្ចប្រជុំពិភាក្សា វាយតម្លៃលើផលប៉ះពាល់ លើគម្រោងសាងសង់ផ្លូវ កាត់ពីខេត្តបាត់ដំបងឆ្ពោះទៅខេត្តសៀមរាប។ ការប្រជុំនេះធ្វើឡើងនៅថ្ងៃទី ៥ សីហា នេះ នៅសាលាខេត្តបាត់ដំបង។
តាមបទបង្ហាញរបស់ក្រុមហ៊ុនម៉ៅការ បានឲ្យដឹងថា ផ្លូវនេះមានប្រវែង ជាង 72 គម ដែល ភ្ជាប់ជាមួយផ្លូវជាតិលេខ 5 និង ចំណុចបញ្ចប់ តភ្ជាប់ជាមួយផ្លូវជាតិលេខ 6 ។
ផ្លូវនេះឆ្លងកាត់ខេត្ត ចំនួន៣ មាន ៥ ស្រុកនិង ១០ ឃុំ។ ខេត្តបាត់ដំបងឆ្លងកាត់ស្រុក ថ្មគោល ឯកភ្នំ និងបួនឃុំ គឺឃុំអូតាគី ពាមឯក តាពូង និងឃុំព្រៃចាស់ ។
ចំណែកខេត្តបន្ទាយមានជ័យផ្លូវនេះរត់កាត់ស្រុក ព្រះនេត្រព្រះ និងឃុំប្រាសាទ និង ខេត្តសៀមរាបឆ្លងកាត់ស្រុក ក្រឡាញ់ ស្រុកពួក ព្រមទាំងឃុំសំបូរ ស្រណាល ព្រៃជ្រូក មុខប៉ែន និងឃុំសសរស្តម្ភ។
តាមបទបង្ហាញ ផ្លូវនេះមានទទឹង ១១ ម៉ែត្រ និង ២៥ ម៉ែត្រ សងខាងផ្លូវ ផ្ទៃដីប៉ះពាល់ និងត្រូវគណនា ២៥ ម៉ែត្រសងខាងអ័ក្សផ្លូវ សរុប ៥០ ម៉ែត្រ។
គ្រួសារដែលរងផលប៉ះពាល់ ដោយសារគម្រោង នឹងត្រូវធ្វើអត្តសញ្ញាណកម្ម ដោយគណៈកម្មាធិការ ដោះស្រាយហេតុប៉ះពាល់ អន្តរក្រសួង (IRC) ហើយការសាងសង់នេះមានរយៈពេល ៤០ ខែ ដោយចំណាយទុនជាង ២៨៨ លានដុល្លាអាមេរិច ជាហិរិញ្ញប្បទាន សហប្រតិបត្តិការ ជាមួយសាធារណរដ្ឋ ប្រជាមានិតចិន។
លោក មូល ធន នាយករដ្ឋបាលសាលាខេត្តបាត់ដំបង បានលើកឡើងថា ក្នុងអង្គប្រជុំបានពិភាក្សា យ៉ាង ផុលផុស ដែលបានឯកភាពគ្នា ១០០% សម្រាប់ដំណើរការនៃការសាងសង់នេះ តែក៏មានផលប៉ះពាល់មួយចំនួនដែលត្រូវធ្វើការដោះស្រាយ។
លើសពីនេះ លោកក៏បានជម្រុញឲ្យជំនាញ រដ្ឋបាលជលផល ទប់ស្កាត់ ការកាប់ទន្ទ្រានព្រៃលិចទឹក ជៀសវាងការដោះស្រាយ ផលប៉ះពាល់របស់គម្រោង៕
អត្ថបទ៖@ ម៉ូតវ៉ោយហូរ
កែសម្រួលអត្តបទ៖ @chan
