ទិវាអាហារូបត្ថម្ភថ្នាក់ក្រោមជាតិ ក្រោមប្រធានបទ៖ “ការបំបៅដោះកូន ដោយទឹកដោះម្ដាយ “ ត្រូវបានប្រារព្ធឡើង នៅសួននាគសន្តិភាព នាថ្ងៃទី ១៦ មករា ឆ្នាំ ២០២០ ដែលមានការចូលរួម ពីរដ្ឋបាលខេត្តបាត់ដំបង មន្ត្រីពាក់ព័ន្ធ និង ប្រជាពលរដ្ឋ ។
ប្រធានបទ៖ “ការបំបៅកូន ដោយទឹកដោះម្ដាយ” គឺជាជម្រើសដ៏ប្រសើរ សម្រាប់អភិវឌ្ឍន៍មូលធនមនុស្សនិង សេដ្ឋកិច្ចជាតិ ដែលអានដោយ លោកស្រី សុំ ចិន្តា បានអានសន្ទរថា ក្នុងទិវាអាហារូបត្ថម្ភ ថា ការលើកកម្ពស់អាហារូបត្ថម្ភ គឺជាបញ្ហាអន្តរវិស័យ ដែលតម្រូវឱ្យមានកិច្ចសហការល្អ ការសម្របសម្រួល និង ការចូលរួមដោយការយកចិត្តទុកដាក់ ទៅលើការអន្តរាគមន៍ និង ការវិនិយោគនៅក្នុង វិស័យពាក់ព័ន្ធនានា ដូចជាវិស័យសុខាភិបាលអប់រំ ការងារកសិកម្ម អភិវឌ្ឍន៍ជនបទ ទឹកស្អាត និង អនាម័យ យេនឌ័រសេដ្ឋកិច្ច និងការគាំពារសង្គមជាដើម។
ប្រធានបទនេះពាក់ព័ន្ធ លើវិស័យសុខាភិបាលអប់រំ និងសេដ្ឋកិច្ច និង មានបំណង បង្កើនការយល់ដឹង ជាសាធារណៈអំពីសារៈសំខាន់ និង គុណតម្លៃទឹកដោះម្ដាយ សំដៅផ្លាស់ប្ដូរឥរិយាបថ អ្នកពាក់ព័ន្ធ ពិសេសមាតាបិតាអាណាព្យាបាល គ្រប់រូបលើការអនុវត្តបំបៅ កូនដោយទឹកដោះម្ដាយ ក្នុងអំឡុងពេល 1 ម៉ោងដំបូង បន្ទាប់ពីសំរាល ហើយការបំបៅកូនដោយទឹកដោះ ម្ដាយតែមួយមុខគត់ សម្រាប់កុមារអាយុ 6 ខែដំបូង នឹងបន្តបំបៅកូនដោយទឹកដោះ ម្ដាយរហូតដល់ កុមារមានអាយុ 2 ឆ្នាំយ៉ាងតិច ឬលើសពីនេះ ជាមួយនឹងការផ្តល់អាហារបន្ថែម ឱ្យបានសមស្របសម្រាប់ កុមារអាយុ ពី 6 ខែឡើងទៅ។
ការបំបៅកូនដោយទឹកដោះម្ដាយ បានផ្ដល់នូវអត្ថប្រយោជន៍ជាច្រើន ដល់ស្ត្រីដែលជាម្ដាយនិងទារក ទើបកើតទាំងផ្នែកសុខភាព និង ទាំងសតិបញ្ញាស្មារតី ព្រមទាំងបានផ្ដល់ដល់ទារកនៅ ការចាប់ផ្ដើមជីវិតដ៏ល្អ ព្រោះទឹកដោះម្ដាយ មានផ្ទុករាល់សារជាតិ ចិញ្ចឹមទាំងអស់ ដែលទារកត្រូវការ និងជាថ្នាំបង្ការដំបូងបំផុត សម្រាប់ការពារទារក ប្រឆាំងនឹងជំងឺផ្សេងៗ។
យុទ្ធនាការ អប់រំផ្សព្វផ្សាយអំពីសារៈសំខាន់ នៃការបំបៅកូនដោយទឹកដោះម្ដាយ ទាំងនៅថ្នាក់ជាតិនិងថ្នាក់ក្រោមជាតិ ក៏ដូចជាបន្តជំរុញ ឲ្យស្ត្រីមានផ្ទៃពោះ ទៅពិនិត្យផ្ទៃពោះ មុនពេលសម្រាល និងសម្រាលកូននៅមន្ទីរពេទ្យឬមណ្ឌលសុខភាព និង បន្តផ្តល់សេវាសុខភាព និង យកចិត្តទុកដាក់ថែទាំ សុខភាពមាតានិងកុមារតាមរយៈការពង្រីក បន្ថែមមន្ទីរពេទ្យ និងសហគមន៍ ស្រឡាញ់ទារកនៅទូទាំងប្រទេសជាដើម៕
អត្ថបទ៖ លោក ម៉ូត វោយ ហូ