ប្រជាពលរដ្ឋមួយចំនួនក្នុងក្រុងបាត់ដំបង បាននិយាយពីបញ្ហាការបង្ហុយផ្សែងបារីនៅតាមភោជនីយដ្ឋាន ដោយសារអ្នកជក់បារីមួយចំនួនបានជក់មិនក្រែងចិត្ត និងគិតពីផលប៉ះពាល់ដល់សុខភាពអ្នដទៃ បើទោះបីជាស្លាកសញ្ញាហាមឃាត់ និងផាកពិន័យក៏ដោយ។
លោក សុខា រស់នៅ ក្រុងបាត់ដំបង បាននិយាយថា៖ លោកជាអ្នកចេះជក់បារី ហើយក៏បានដឹងពីផលប៉ះពាល់ដល់សុខភាពខ្លួនឯង និងអ្នកដទៃដែរ ប៉ុន្តែលោកមិនទាន់អាចផ្តាច់ការជក់បារីបាន។ យ៉ាងណាមិញ នៅពេលលោកទៅញុំាំអីតាមភោជនីយដ្ឋាននានា លោកក៏មានការក្រែងចិត្តណាស់ដែរ ខ្លាចក្រែងការបង្ហុយផ្សែងបារី ខានដល់អ្នកជិតខាង។
ចំណែក បងស្រី សុភី ឈ្មោះដែលកម្មវិធីសន្ទានមតិដាក់ជូន ជាម្ចាស់ហាងអាហារដ្ឋានមួយកន្លែងក្នុងក្រុងបាត់ដំបង បានលើកឡើងថា៖ មានភ្ញៀវខ្លះចេះជក់បារីនិងខ្លះមិនចេះ, ភ្ញៀវខ្លះធុំក្លិនផ្សែរបារីមិនបាន ប៉ុន្តែបងស្រីថាពិបាកនឹងប្រាប់ភ្ញៀវដែលជក់ក្បែរគ្នានោះឲ្យឈប់ពិសារបារីណាស់។ បងស្រីបានបញ្ជាក់ថា កន្លងមកដល់បច្ចុប្បន្នគឺមិនឃើញការណែនាំពីមន្ត្រីជំនាញពាក់ព័ន្ធ ទៅផ្សព្វផ្សាយពីការផាកពិន័យ និងហាមឃាត់ជក់បារីនៅតាមទីសាធារណៈទេ។
តាមរបាយការណ៍៖ មួយចំនួន និងគ្រូពេទ្យជំនាញជាច្រើនបានបង្ហាញថា ការជក់បារីនៅតាមទីសាធារណៈគឺមានផលប៉ះពាល់ខ្លាំងណាស់ចំពោះអ្នកនៅជុំវិញជាជាងអ្នកជក់ខ្លួនឯង ដូចជាកុមារ ស្ត្រីមានផ្ទៃពោះជាដើម។ បញ្ហានេះ យោងតាមអនុក្រឹតលេខ ៤៣ អនក្រ.បក ស្តីពីវិធានការហាមជក់ ឬបង្ហុយផ្សែងផលិតផលថ្នាំជក់នៅកន្លែងធ្វើការ ឬកន្លែងទីសាធារណៈ ជនណាជក់បារីនៅកន្លែងហាមឃាត់ត្រូវពិន័យ ២០០០០រៀល។ «លើសពីនោះបើចាប់បានអ្នកជក់បារីក្នុងភោជនីយដ្ឋាន ឬសណ្ឋាគារ នឹងត្រូវផាកពិន័យគុណនឹង២ដង ទៅលើម្ចាស់ហាងតែម្តង ដែលស្មើ៤ម៉ឺនរៀលក្នុងមួយដង»។ ទោះយ៉ាងណាក៏ដោយ ប្រជាពលរដ្ឋមួយចំនួនយល់ថា ការទប់ស្កាត់ និងការផ្សព្វផ្សាយមានកម្រិតនៅឡើយ។
អត្តបទ៖ (បទយកការណ៍) ហ៊ាន វាសនា
