ការិយាល័យប្រជាពលរដ្ឋខេត្តបាត់ដំបង ជាអង្គភាពអព្យាក្រឹតមានតួនាទីទទួល សម្របសម្រួល និងដោះស្រាយពាក្យបណ្ដឹងក្រៅប្រព័ន្ធតុលាការ ពីសំណាក់ប្រជាពលរដ្ឋ និងមន្ត្រីរាជការដែលកើតទុក្ខមិនសុខចិត្តទីនឹងការផ្ដល់សេវាសាធារណៈ ការគ្រប់គ្រង និងការសម្រេចកិច្ចការផ្សេងៗរបស់រដ្ឋបាលខេត្ត និងមន្ទីរអង្គភាពជុំវិញខេត្ត។
លោក រ៉េន រស់ ប្រធានការិយាល័យប្រជាពលរដ្ឋខេត្តបាត់ដំបង បានលើកឡើងថាៈ ប្រជាពលរដ្ឋនិងមន្ត្រីរាជការអាចប្ដឹងលើបញ្ហានានាក្នុងសមត្ថកិច្ចការិយាល័យប្រជាពលរដ្ឋខេត្តបាត់ដំបងដូចខាងក្រោមៈ
1. សេចក្ដីសម្រេចរបស់រដ្ឋបាលខេត្តនិងមន្ទីរអង្គភាពជំនាញជុំវិញខេត្តក្នុងរូបភាពជាដីកាសេចក្ដីណែនាំ សេចក្ដីជូនដំណឹង និងលិខិតរដ្ឋបាលផ្សេងៗទៀតដែលផ្ទុយនឹងគោលការណ៍ច្បាប់នឹងមានផលប៉ះពាល់មិនល្អដលប្រយោជន៍របស់បុគ្គល អង្គភាពឬសហគមន៍។
2. ការបំពេញការងារ និងអាកប្បកិរិយា មិនល្អរបស់បុគ្គលិកក្រុមប្រឹក្សាខេត្ត បុគ្គលិកមន្ទីរ អង្គភាពជំនាញនៅថ្នាក់ខេត្ត និងភ្នាក់ងារទទួលសមត្ថកិច្ច ដូចជាការមិនអនុវត្តតាមតួនាទីភារកិច្ចរបស់ខ្លួន ការមិនគោរពច្បាប់ បទបញ្ជាំនិងក្រមសីលធម៌វិជ្ជាជីវៈ ការប្រើពាក្យសម្ដី ឬកាយវិការមិនសមរម្យជាដើម។
3. ការគ្រប់គ្រងនិងការប្រើប្រាស់ហិរញ្ញវត្ថុ និងទ្រព្យសម្បត្តិរបស់រដ្ឋបាលខេត្ត និងមន្ទីរ អង្គភាពជំនាញ នៅថ្នាក់ខេត្តគឺសំដៅទៅលើភាពមិនប្រក្រតីនៃការគ្រប់គ្រង ការចាត់ចែង និងការប្រើប្រាស់ហិរញ្ញវត្ថុ និងទ្រព្យសម្បត្តិរបស់រដ្ឋបាលខេត្តនិងមន្ទីរ អង្គភាពជំនាញ ដូចជាផ្ទុយនឹងគោលការណ៍ បែបបទ និងនីតិវិធីដែលបានកំណត់ជាធរមាន ប្រើប្រាស់មធ្យោបាយ សម្ភារៈ បរិក្ខារ ដើម្បីផលប្រយោជន៍ផ្ទាល់ខ្លួន ឬក្រុមរបស់ខ្លួនគ្មានតម្លាភាព គ្មានគណនេយ្យភាព គ្មានសុចរិតភាព និងគ្មានសមធម៌។
4. ការផ្ដល់សេវាសាធារណៈរបស់រដ្ឋបាលខេត្ត មន្ទីរ អង្គភាពជំនាញ និងភ្នាក់ងារទទួលសមត្ថកិច្ចសំដៅទៅលើភាពមិនប្រក្រតីនៃការផ្ដល់សេវាសាធារណៈ និងការអភិវឌ្ឍមូលដ្ឋានរបស់រដ្ឋបាលខេត្ត មន្ទីរ អង្គភាពជំនាញ និងភ្នាក់ងារទទួលសមត្ថកិច្ចដូចជាៈ
• ផ្ទុយនឹងគោលការណ៍ បែបបទ នីតិវិធី និងស្តង់ដាដែលបានកំណត់
• យកកម្រៃនៃការផ្ដល់សេវាសាធារណៈលើសពីការកំណត់
• មិនអនុវត្តទៅតាមរយៈពេលផ្ដល់សេវាដែលបានកំណត់
• គ្មានតម្លាភាព គ្មានគណនេយ្យភាព គ្មានសុចរិតភាព និងគ្មានសមធម៌
• មិនអនុវត្តតាមបរិមាណ និងគុណភាពដែលបាលកំណត់។
ប្រជាពលរដ្ឋដែលចង់ដាក់ពាក្យបណ្ដឹងៈ
1. អាចអញ្ជើញមកសាលាខេត្តបាត់ដំបងដើម្បីដើម្បីដាក់ពាក្យបណ្ដឹងនៅផ្នែកទទួលពាក្យបណ្ដឹងនិងកិច្ចការរដ្ឋបាលនៃការិយាល័យប្រជាពលរដ្ឋ ឬដាក់ពាក្យបណ្ដឹងនៅតុពិសេសរបស់ការិយាល័យប្រជាពលរដ្ឋស្ថិតនៅក្នុងច្រកចេញចូលតែមួយដែលមានទីតាំងនៅអាគារ A សាលាខេត្តបាត់ដំបង។ ការអញ្ជើញមកដាក់ពាក្យបណ្ដឹង ប្រជាពលរដ្ឋអាចអញ្ជើញមកដោយផ្ទាល់ឬតាមរយៈតំណាងដែលទទួលបានការប្រគល់សិទ្ធិ ហើយការប្ដឹងនេះទៀតសោត ប្រជាពលរដ្ឋអាចបង្ហាញ ឬមិនបង្ហាញឈ្មោះរបស់ខ្លួនក៏បាន។ បើមានការលំបាកក្នុងការបំពេញទម្រង់ពាក្យបណ្ដឹង បុគ្គលិកទទួលបន្ទុកកត់ត្រាពាក្យបណ្ដឹងនិងចាំជួយជានិច្ច។ រាល់ការដាក់ពាក្យបណ្ដឹងរបស់ប្រជាពលរដ្ឋគឺធ្វើឡើងដោយពុំមានគិតថ្លៃសេវាឡើយ។
2. ប្រជាពលរដ្ឋអាចប្ដឹងតាមរយៈលេខទូរស័ព្ទ 012 879 074។ ព័ត៌មានដែលទទួលបានតាមរយៈទូរស័ព្ទនិងត្រូវបញ្ចូលក្នុងទម្រស់ពាក្យបណ្ដឹង ឬទម្រង់ព័ត៌មាន ដោយបុគ្គលិកទទួលបន្ទុក បន្ទាប់មកត្រូវសុំការយល់ព្រមពីសំណាក់បងប្អូនអ្នកប្ដឹង ហើយបុគ្គលិករូបនេះ ត្រូវចុះហត្ថលេខាលើពាក្យបណ្ដឹង។
3. ប្រជាពលរដ្ឋអាចប្ដឹងមកការិយាល័យប្រជាពលរដ្ឋបានតាមរយៈសារអេឡិចត្រូនិច ឬតាមរយៈប្រព័ន្ធផ្សព្វផ្សាយសង្គមដែលការិយាល័យនឹងរៀបចំឡើងក្នុងពេលឆាប់ៗខាងមុខ។ ក្នុងករណីបណ្ដឹងធ្វើឡើងតាមប្រព័ន្ធអេឡិចត្រូនិចមានខ្លឹមសារមិនគ្រប់គ្រាន់ បុគ្គលិកទទួលបន្ទុកនឹងធ្វើការទាក់ទងទៅកាន់លោកអ្នកដោយផ្ទាល់ដើម្បីស្នើរសុំព័ត៌មានបន្ថែមយកមកបំពេញតាមទម្រង់ពាក្យបណ្ដឹង បន្ទាប់មកទើបបោះពុម្ពពាក្យបណ្ដឹងដោយមានចុះហត្ថលេខារបស់បុគ្គលិកទទួលបន្ទុក
សំគាល់ៈ បច្ចុប្បន្នការិយាល័យប្រជាពលរដ្ឋខេត្តបាត់ដំបងកំពុងរង់ចាំការណែនាំរបស់ក្រសួងមហាផ្ទៃក្នុងការដាក់ឱ្យដំណើរការការងាររបស់ខ្លួន ដែលនឹងត្រូវអនុវត្តក្នុងពេលឆាប់ៗខាងមុខនេះ។
ការស៊ើបអង្កេតរបស់ការិយាល័យប្រជាពលរដ្ឋមានលក្ខខណ្ឌ ស៊ើបអង្កេតត្រូវធ្វើឡើងដោយយុត្តិធម៌ រក្សារការសម្ងាត់ អព្យាក្រឹត្យ មិនលំអៀង និងមានលក្ខណៈច្បាស់លាស់។
ប្រជាពលរដ្ឋគ្រប់រូបត្រូវបានលើកទឹកចិត្តក្នុងការផ្ដល់ព័ត៌មាន ភស្តុតាងនានា និងការធ្វើសាក្សី ព្រមទាំងទទួលបាននូវកិច្ចការពារឱ្យផុតពីការគំរាមកំហែង និងការសងសឹកណាមួយ។
អ្នកផ្ដល់ព័ត៌មាននិងអ្នករៀបចំរបាយការណ៍ស៊ើបអង្កេតត្រូវបានការពារពីបណ្ដឹងបរិហាកេរ្តិ៍
លើកលែងតែការផ្ដល់ព័ត៌មាននិងរបាយការណ៍ទុច្ចរិត។
នីតិវិធីការស៊ើបអង្កេតរបស់ការិយាល័យប្រជាពលរដ្ឋត្រូវធ្វើឡើង៣ដំណាក់កាល:
1. ដំណាក់កាលទី១ នៅមុនពេលស៊ើបអង្កេតគឺមានសិក្សាអង្គហេតុ និងច្បាប់ដែលពាក់ព័ន្ធ បន្ទាប់មកកំណត់សមាសភាពចុះស៊ើបអង្កេតដោយមានការបែងងចែកតួនាទី ភារកិច្ច។ បន្ទាប់មកទៀតគឺមានរៀបចំ ផែនការស៊ើបអង្កេត ដោយកំណត់អ្នកដែលត្រូវសួរចម្លើយ ព្រមទាំងរៀបចំកម្រងសំណួរ វិធីសាស្ត្រ រួចត្រៀមសម្ភារៈក្នុងការចុះស៊ើបអង្កេត។
2. ដំណាក់កាលទី២ នៅពេលចុះស៊ើបអង្កេតគឺត្រូវចុះទៅប្រមូលភស្តុតាង និងសម្ភាសន៍អ្នកដែលពាក់ព័ន្ធទាំងអស់ បន្ទាប់មកវិភាគភស្តុតាងដែលប្រមូលបាន រួចធ្វើរបាយការណ៍និងផ្ដល់អនុសាសន៍ អំពីវិធានការនៃការដោះស្រាយបណ្ដឹង។
3. ដំណាក់កាលទី៣ ក្រោយពេលស៊ើបអង្កេតគឺត្រូវរៀបចំរបាយការណ៍ផ្ញើទៅប្រធានអង្គភាពនៃចុងចម្លើយទៅអភិបាលខេត្ត ទៅប្រធានក្រុមប្រឹក្សាខេត្ត ទៅក្រសួងមហាផ្ទៃដើម្បីដោះស្រាយបណ្ដឹងតាមនីតិវិធី។ ជាចុងក្រោយ លទ្ធផលនៃការស៊ើបអង្កេតត្រូវបានបិទផ្សាយជាសាធារណៈ។
អត្ថបទ៖ កញ្ញា រិន ម៉ារីយ៉ាន