សមត្ថកិច្ចបានបញ្ជាក់ថាក្រោយពិនិត្យសាកសពស្ត្រីពីរនាក់ដែលឆេះក្នុងផ្ទះកើតហេតុ ឃើញមានស្នាមរបួសក្បាល និង ក ដែលសមត្ថកិច្ចសង្ស័យជាករណីឃាតកម្ម ។
លោកវរសេនីយ៍ទោ លឹម ពុទ្ធីឡា ស្នងការរងនៃស្នងការដ្ឋានខេត្តបាត់ដំបងដែលដឹកនាំចុះស្រាវជ្រាវករណីនេះបញ្ជាក់ថាសមត្ថកិច្ចដាក់ការសង្ស័យលើបុរសម្នាក់ឈ្មោះយៃ ឡើយ អាយុ៥២ឆ្នាំដែលត្រូវជាប្តីនិងជាឪពុកជនរងគ្រោះខាងលើ ដែលមិនមានវត្តមាននៅកន្លែងកើតហើតុនិងបានបាត់មុខពីមូលដ្ឋាន ។
លោកបញ្ជាក់ថាសមត្ថកិច្ចកំពុងស្រាវជ្រាវស្វែងរកបុរសជាជនសង្ស័យខាងលើនេះ ។
សូមបញ្ជាក់ថានៅវេលាម៉ោង០១ និង៤០នាទីរំលងអាធ្រាតឈានចូល ថ្ងៃទី៣១ខែឧសភា ឆ្នាំ២០២០ មានគ្រោះអគ្គិភ័យមួយបានកើតឡើង ក្នុងលំនៅដ្ឋានមួយស្ថិតនៅក្រុមទី១២ ភូមិថ្មី ឃុំបន្សាយត្រែង ស្រុកថ្មគោល ខេត្តបាត់ដំបង ដែលលំនៅដ្ឋាននេះសាងសង់អំពីឈើ ប្រក់ដំបូលរួមទាំងជញ្ជាំងដោយសង្ក័សី មានម្ចាស់ឈ្មោះយៃឡើយ ភេទប្រុស អាយុ ៥២ឆ្នាំ ។
ក្នុងពេលអគ្គិភ័យកំពុងឆាបឆេះយ៉ាងសន្ធោរសន្ធៅ ត្រូវបានអ្នកភូមិផ្តល់ព័ត៌មានដល់សមត្ថកិច្ចនគរបាលនៃអធិការដ្ឋាននគរបាលស្រុកថ្មគោល ហើយភ្លាមៗរថយន្តពន្លត់អគ្គិភ័យរបស់នគរបាលចេញអន្តរាគមន៍ជួយពន្លត់។
ក្រោយកិច្ចអន្តរាគមន៍ពន្លត់អគ្គិភ័យបានរលត់ទាំងស្រុង ហើយនៅពេលនោះសមត្ថិកិច្ចបានប្រទះឃើញសាកសពមនុស្សចំនួន០២ នាក់ស្ថិតនៅក្នុងលំនៅដ្ឋានកើតហេតុខាងលើ ដែលត្រូវបានអគ្គិភ័យឆាបឆេះមើលលែងស្គាល់អត្តសញ្ញាណទៅហើយ ព្រមទាំងខូចខាតទ្រព្យសម្បត្តិមួយចំនួនធំនៅក្នុងលំនៅដ្ឋាននេះផងដែរ។
ក្រោយការពិនិត្យជនរងគ្រោះដែលស្លាប់ក្នុងករណីខាងលើ មានឈ្មោះ ៖
១-ឈ្មោះ គិម ធឿន ស្រី អាយុ ៥២ ឆ្នាំ ត្រូវជាប្រពន្ធរបស់ឈ្មោះ យៃ ឡើយ ម្ចាស់ផ្ទះកើតហេតុ
២- ឈ្មោះ គិម សៀវម៉ី ភេទស្រី អាយុ ១៨ ឆ្នាំ ជាកូនម្ចាស់ផ្ទះ