កិច្ចប្រជុំពិភាក្សាអំពី ការត្រៀមអនុវត្តគំរោង ធ្វើឱ្យប្រសើរឡើង នៃការគ្រប់គ្រងសម្រាម សំណល់រឹង និងសំណល់ប្លាស្ទិក នៅប្រទេសកម្ពុជា ក្រោមការគាំទ្រ ហិរញ្ញប្បទាន ពីធនាគារពិភពលោក បានប្រព្រឹត្តទៅ នារសៀលថ្ងៃទី ១៩ ខែមេសាកន្លងទាំងនេះ ដោយមានការអញ្ជើញចូលរួម ពីឯកឧត្តម សុខលូ អភិបាលនៃគណៈ អភិបាលខេត្តបាត់ដំបង និងឯកឧត្តម បួន ហេង អគ្គលេខាធិការរង នៃអគ្គលេខាធិការដ្ឋាន គណៈកម្មាធិការគ្រប់គ្រងសំរាម សំណល់រឹង ទីប្រជុំជន និងជាប្រធាននាយកដ្ឋាន មុខងារនិងធនធាន នៃអគ្គនាយកដ្ឋានរដ្ឋបាល ក្រសួងមហាផ្ទៃ។
ក្រោមកិច្ចសហប្រតិបត្តិការ របស់ក្រសួងមហាផ្ទៃ ជាមួយធនាគារពិភពលោក ក្រសួងសេដ្ឋកិច្ចនិងហិរញ្ញវត្ថុ ក្រសួងបរិស្ថាន និងក្រសួងសាធារណការ និងដឹកជញ្ជូន បានរៀបចំគម្រោង ធ្វើឱ្យប្រសើរឡើង នៃការគ្រប់គ្រងសំរាម សំណល់រឹង និងសំណល់ប្លាស្ទិក នៅប្រទេសកម្ពុជា ក្រោមជំនួយហិរញ្ញប្បទាន ពីធានាគារពិភពលោក។
បច្ចុប្បន្នគម្រោងបាន បញ្ចប់ការសិក្សានិងវាយតម្លៃ លើការរៀបចំគម្រោងរួចហើយ និងកំពុងត្រៀមដាក់ឆ្លង ក្រុមប្រឹក្សាភិបាល ធនាគារពិភពលោក ដើម្បីអនុម័ត ហើយនឹងត្រូវចាប់ផ្ដើមអនុវត្ត នៅពាក់កណ្ដាលឆ្នាំ ២០២៣ ដែលមានសមាសភាគ អនុវត្តគម្រោង ចំនួន ៣ គឺ ក្រសួងបរិស្ថាន( សមាសភាគទី ១) ក្រសួងមហាផ្ទៃ(សមាសភាគទី២) និងក្រសួងសាធារណការនិងដឹកជញ្ជូន(សមាសភាគទី៣) ហើយគម្រោងនេះត្រូវ អនុវត្តនៅស្រុកក្រុង នៃខេត្តគោលដៅចំនួន ៥ គឺក្រុងសៀមរាប ក្រុងតាខ្មៅ ខេត្តកណ្ដាល ក្រុងច្បារមន ខេត្តកំពង់ស្ពឺ ស្រុកបវេល និងស្រុកថ្មគោល ខេត្តបាត់ដំបង និងក្រុងព្រះសីហនុ។
ឯកឧត្តម បួនហេង បានបញ្ជាក់ថា ក្រសួងមហាផ្ទៃ បានខិតខំស្វះស្វែងរកដៃគូ សហការជាមួយ និងធនាគារពិភពលោក ក៏ដូចជាក្រសួងពាក់ព័ន្ធនានា ពិសេសក្រសួងបរិស្ថាន ក្រសួងសាធារណការនិងដឹកជញ្ជូន និងក្រសួងសេដ្ឋកិច្ចហិរញ្ញវត្ថុ ក្នុងការកសាងហេដ្ឋារចនាសម្ព័ន្ធ នៃទីលានចាក់សំរាម ក្នុងស្រុកថ្មគោល និងស្រុក បវែលខេត្តបាត់ដំបង។
ឯកឧត្តមបានបន្តទៀតថា រដ្ឋបាលខេត្តបាត់ដំបង នឹងត្រូវសហការជាមួយ ក្រសួងពាក់ព័ន្ធផ្សេងៗទៀត ក្រោមជំនួយរបស់ធនាគារពិភពលោក និងគាំទ្រដោយក្រសួងមហាផ្ទៃ ក្នុងការបង្កើតនូវហេដ្ឋារចនាសម្ព័ន្ធ ក្នុងការរៀបចំទីតាំង បង្កើតទីលានចាក់សម្រាម និងទីលានសម្រាប់ផ្ទេរ សម្រាមរវាងស្រុកថ្មគោល និងស្រុកបវេល ហើយសម្រាម១៥% ដែលបានចាក់នៅទិលាននេះ នឹងត្រូវកែច្នៃ ឱ្យប្រើប្រាស់ម្ដងទៀត ដើម្បីជួយសម្អាតបរិស្ថាន ព្រមទាំងជួយសម្រួល មិនឱ្យមានការកំណរ កំណើននៃការប្រើប្រាស់ ប្លាស្ទីកមួយកំរិតផងដែរ ហើយក្នុងនោះ ៧៥% នៃប្រជាពលរដ្ឋ ដែលរស់នៅក្នុងស្រុកគោលដៅទាំងពីរ នឹងត្រូវមានការប្រើប្រាស់ នៅសេវា ប្រមូលសម្រាម ដើម្បីកាត់បន្ថយនូវភាព អាណាធិបតេយ្យ ក្នុងការទុកដាក់សំរាម ដើម្បីរក្សាសោផនភាព ក្នុងស្រុកក៏ដូចជា នៅតាមគេហដ្ឋាននីមួយៗ ឱ្យមានភាពស្រស់បំព្រង។
ឯកឧត្តម សុខលូ បានមានប្រសាសន៍ថា ខេត្តបាត់ដំបង ពិតជាមានសំណាងណាស់ ដែលរាជរដ្ឋាភិបាល បានជ្រើសរើស រៀបចំគំរោងគ្រប់គ្រងសម្រាម ហើយបញ្ហានេះ គឺជាកង្វល់មួយ ដល់រដ្ឋបាលខេត្ត បានខិតខំជាយូរមកហើយ ក្នុងការរៀបចំកន្លែងទុកដាក់ កាកសំណល់ ឲ្យបានត្រឹមត្រូវ ព្រោះសម្រាលមានការកើន ជាលំដាប់ ដែលប្រភពមកពី បញ្ហាកំណើនប្រជាពលរដ្ឋ និងដោយសារទំហំទីលាន ចាក់សំរាមចាស់ បានប្រើប្រាស់អស់លទ្ធភាពហើយ។
ឯកឧត្តមក៏ជំរុញដល់អភិបាលស្រុក ដែលពាក់ព័ន្ធ សូមចាត់ចែងរកដីសម្រាប់ បង្កើតទីលាន ចាក់សម្រាម ដែលមានទីតាំងនៅចន្លោះ ឬនៅជិតព្រំប្រទល់ នៃស្រុកទាំងពីរ ដែលជាតំបន់មិនលិចទឹក និងមិនប៉ះពាល់ដល់ សម្បត្តិបេតិកភណ្ឌ ដែលក្នុងនោះត្រូវចន្លោះ ៣0 គីឡូម៉ែត្រពីគ្នា យ៉ាងច្រើនព្រមទាំង បង្កើតឡដុតសម្រាមផងដែរ។
ឯកឧត្តមក៏បានសំណូមពរដល់ប្រជាពលរដ្ឋ ដែលរស់នៅក្នុងខេត្តបាត់ដំបងទាំងអស់ ពិសេសប្រជាពលរដ្ឋស្រុកបវេល និងស្រុកថ្មគោល សូមចូលរួមទាំងអស់គ្នា ក្នុងការគ្រប់គ្រងសម្រាម នឹងជួយថែរក្សាបរិស្ថាន ដើម្បីសោភណ្ឌភាព ផាសុខភាព ឱ្យភូមិស្រុក និងខេត្តរបស់យើង ក្នុងគោលដៅឲ្យមានភាពទាក់ទាញ និងលេចធ្លោ មើលទៅគួរឱ្យចង់រស់នៅ៕ ប្រភព រដ្ឋបាលខេត្ត
